Цената на златото деновиве бележи несвојствен пад, во услови кога кризата на Блискиот Исток и тензиите со Иран сè уште траат. Ова е спротивно на досегашните пазарни логики, кога во време на геополитички ризици инвеститорите традиционално се префрлаа кон злато како „сигурно засолниште“, што доведуваше до раст на неговата цена. Овој пат, тоа не е случај. Златото падна под 5.000 долари за унца, што отвора дилеми дали се менува однесувањето на пазарите. Според Андреј Пулејков од КБ Инвест, станува збор за краткорочна корекција, а не за пресврт на трендот.
„Две недели е премногу краток период за да се донесат било какви заклучоци. Второ, ако правиме споредба со истиот период лани, златото бележи значителни стапки на раст, од над 65 проценти. Причините за долгорочниот раст остануваат. Имено, зголемената побарувачка од централните банки, посебно од БРИКС земјите, кои постепено го намалуваат нивото на девизни резерви деноминирани во американски долари за сметка, да речеме, на благородни метали и останати валути, ке проложи и понатаму.“, вели Андреј Пулејков од КБ Инвест.
Дополнително, според него, постојат јасни фактори што ќе продолжат да ја туркаат цената нагоре – геополитичките тензии, санкциите, растот на јавниот долг и структурните проблеми во финансискиот систем. Врз основа на овие фактори, проекциите се дека цената на златото до крајот на годината може да достигне меѓу 5.500 и 6.000 долари за унца.
Паралелно со златото, на пазарите се случува уште една необична појава – пад на цените на американските државни обврзници. Вообичаено, во време на кризи тие растат, бидејќи инвеститорите ги сметаат за најсигурна инвестиција. Но, во последните неколку недели трендот е обратен. Според Пулејков, причините за оваа појава се повеќеслојни – од инфлаторните притисоци до неизвесноста околу економските политики во САД.
„Растот на цените на енергенсите сигурно ќе предизвика нов инфлаторен бран. Второ, политиката на намалување на каматните стапки сигурно ќе биде ставена на пауза. Понатаму огромните буџетски дефицити што планирани, што непланирани ради конфликта на Блискиот Исток, ќе продолжат. Ќе продолжи растот на јавниот долг, ќе се зголемуваат трошоците за негово финансирање и така натаму. А сето ова па ке има негативно влијање, нормално, кај довербата на инвеститорите.“, рече Пулејков.
Овие движења укажуваат дека пазарите влегуваат во период на зголемена неизвесност, каде традиционалните „сигурни засолништа“ веќе не реагираат како порано. Ако ваквите трендови продолжат, тоа може да значи поскапо финансирање на долговите, нов инфлаторен притисок и потенцијално забавување на глобалната економија.