Во Европскиот парламент денеска беа претставени кандидатите за наградата „Сахаров“ за слобода на мислата за 2026 година, кои ги номинираа европратеничките групи на заедничка седница на Комитетот за надворешни работи, Поткомитетот за човекови права и Комитетот за развој. Меѓу номинираните поединци и организации се палестински педијатар, арапско-еврејско антивоено движење во Израел и претседателот на Ел Салвадор.
За наградата е номиниран палестинскиот педијатар Хусам Абу Сафија, кого израелските власти го држат во притвор од декември 2024 година без судење и без подигнато обвинение. Абу Сафија беше директор на болница во северниот дел на Газа, а беше уапсен откако одби да ја спроведе израелската наредба за евакуација на објектот. Него го номинираа пратеничките групи на Зелените и Левицата.
Втор кандидат, предложен од групата „Европа на суверените нации“, е Најиб Букеле, претседател на Ел Салвадор, кој на следните претседателски избори во 2027 година ќе се кандидира за трет мандат по уставните измени со кои беа укинати ограничувањата на нивниот број. Букеле со борбата против криминалот стекна голема поддршка од гласачите, но организациите за човекови права наведуваат дека во рамките на таа борба илјадници луѓе биле произволно апсени.
Масовното заедничко арапско-еврејско движење во Израел „Стоиме заедно“ (Standing Together) е номинирано на предлог на групата „Обнови ја Европа“. Ова движење се залага за мир, еднаквост и социјална правда.
Меѓународниот кривичен суд и неговите функционери ги номинираше групата Прогресивна алијанса на социјалистите и демократите (S&D), додека Европската народна партија (EPP) и Европските конзервативци и реформисти (ECR) го предложија танзанискиот опозициски лидер Тунду Лису. Лису беше уапсен на политички собир во 2025 година и обвинет за велепредавство, за кое е предвидена смртна казна, поради — според обвинителството — поттикнување на граѓаните да го спречат одржувањето на парламентарните избори.
Меѓу кандидатите се и 21-годишните близначки Таране и Ромина Рахими од Иран, кои беа уапсени по нивното учество на антирежимските протести. Тие беа обвинети по повеќе точки, меѓу кои и за „војување против Бога“ (мохаребех), при што Таране е осудена на смрт, а Ромина на 25 години затвор. Нивното семејство тврди дека сестрите во затвор биле изложени на тортура и принудувани да дадат признанија. Нив ги номинираше групата „Патриоти за Европа“.
Гласањето за избор на тројцата кандидати кои ќе влезат во потесниот круг ќе се одржи на 19 октомври, додека Конференцијата на претседатели на Европскиот парламент одлуката за добитникот ќе ја донесе на 22 октомври.
Европскиот парламент секоја година ја доделува наградата „Сахаров“ за слобода на мислата како признание за поединци и организации кои ги бранат човековите права и основните слободи. Минатогодишни добитници на наградата беа полскиот новинар од Белорусија Анџеј Почобут и грузиската новинарка Мзија Амаглобели — и двајцата во затвор.