Пилот на авиокомпанијата „JetBlue Airways“ пријавил можен судир со дрон за време на приближувањето кон меѓународниот аеродром „Џон Ф. Кенеди“ во Њујорк. Федералната управа за воздухопловство (FAA) соопшти дека авионот безбедно слетал и дека при последователниот преглед не било откриено никакво оштетување. Агенцијата започнала истрага за инцидентот, пишува Би-Би-Си.
Ова е последен во низата опасни средби меѓу беспилотни летала и комерцијални авиони. Само неколку дена претходно, пилот на „United Airlines“ пријавил дека за малку избегнал судир со дрон додека се приближувал кон меѓународниот аеродром „Њуарк Либерти“ во Њу Џерси.
Пилотот пријавил удар од дрон
FAA наведе дека пилотот на „JetBlue“ пријавил дека дронот го удрил авионот на висина од околу 900 метри, околу 7:15 часот по локално време.
Во аудиоснимката од комуникацијата со контролата на летање, која ја објави ATC.com, се слуша како пилотот ја известува кулата за судирот.
„Подготвени сме за слетување на пистата 13 лево“, рекол пилотот, а потоа додал: „Само кратка информација, не успеав да ја известам контролата за пристап, но се судривме со дрон таму во свртувањето“.
Кога контролорот прашал: „Велите дека сте се судриле?“, пилотот потврдил: „Да, нè удри точно над пилотската кабина“.
Од „JetBlue“ за Би-Би-Си изјавиле дека летот слетал без проблеми, патниците нормално се симнале, а авионот бил повлечен од употреба за проверка, при што не биле пронајдени оштетувања ниту докази за судир.
FAA проценува дека секој месец добива повеќе од 100 пријави за забележани дронови во близина на аеродроми, и покрај правилата кои забрануваат неовластено управување со беспилотни летала во такви области.
Агенцијата предупредува дека несовесните оператори можат да се соочат со високи парични казни и кривични пријави, вклучително и можност за затворска казна.