Двете девојки и момчето, на возраст од 19, 25 и 26 години, кои беа хоспитализирани во болницата Папаниколау во Солун по трагичниот пожар во дискотека „Пулс“ во Кочани, се во критична состојба. Според директорката на Одделот за изгореници, доктор Софија Пападопулу, тие се подложени на интензивна медицинска нега и сè уште не може да се изрече дека се вон животна опасност.
По посетата на министрите за надворешни работи, г. Тимчо Муцунски и министерот за здравство, д-р Арбен Таравари, Пападопулу истакнала дека тројцата пациенти имаат изгореници на телото од 15 до 25 отсто. Денеска двајца од пациентите ќе бидат подложени на втора операција, а во следните денови се очекува и третото лице да ја има потребната хируршка интервенција. Сепак, доктор Пападопулу нагласила дека најголемата загриженост е поврзана со вдишувањето на чадот, бидејќи тоа значително ги комплицира нивните здравствени состојби, со оштетување на белите дробови и дишните патишта. Според неа, ова ќе има долгорочни последици на нивното здравје, но се преземаат сите мерки за да се обезбеди најдобра грижа за нив.
Пациентите се на интензивна нега и се приклучени на апарати за поддршка на животните функции.
Во Солун беа пренесени уште двајца повредени, кои се хоспитализирани во Воената болница 424, додека пак од синоќа во Атина се лекуваат уште три лица.