Со вечерашниот натпревар во 19 часот меѓу Канада и Мароко започнува осминафиналната фаза на Светското првенство 2026. Вториот четвртфиналист ќе биде познат по дуелот меѓу Франција и Парагвај, кој се игра во 23 часот.
Канада, една од трите земји-домаќини на Мундијалот, беше првата репрезентација што обезбеди пласман во осминафиналето. Во Лос Анџелес ја совлада Јужна Африка со 1:0, благодарение на голот на Стефен Еустакио во судиското продолжение, со што за првпат во својата историја се пласираше во оваа фаза на светските првенства.
Мароко, пак, избори место меѓу најдобрите 16 репрезентации откако по изведување пенали ја елиминираше Холандија со 3:2.
Натпреварот на стадионот во Хјустон ќе биде трет меѓусебен дуел на Канада и Мароко, кој ги доби претходните две средби, вклучително и победата од 2:1 во групната фаза на Светското првенство во Катар во 2022 година.
Французите обезбедија пласман во осминафиналето со убедлива победа од 3:0 над Шведска, додека Парагвај го приреди најголемото изненадување на турнирот, елиминирајќи ја Германија по изведување пенали, откако натпреварот заврши 1:1 по регуларните 90 минути и продолженијата. Двете селекции досега одиграле три натпревари, но вечерашниот ќе биде нивниот прв официјален дуел. Во две пријателски средби ремизираа, додека на еден натпревар Франција славеше убедливо со 5:0.