Шпанскиот фудбалер Хезус де Мигел, кој почина во вторникот откако тешко се повреди по судир со противничкиот голман за време на натпревар во шпанската Втора лига, е погребан во Навахермоса, во покраината Толедо.
На погребот присуствуваа стотици луѓе, вклучувајќи истакнати личности од шпанскиот фудбал, меѓу кои претседателот на Реал Мадрид, Флорентино Перез, и тренерот на шпанската репрезентација, Луис де ла Фуенте.
Семејството на 30-годишниот Де Мигел изрази јавна благодарност за поддршката која ја доби по трагедијата.
„Немаме доволно зборови да им се заблагодариме на сите што ни испратија пораки, ни се јавија или изразија сочувство“, соопшти семејството, барајќи да се почитува нивната приватност.
Во Навахермоса, село со околу 2.000 жители каде што се родени родителите на играчот и каде што живеат неговите баба и дедо, на околу 100 километри од шпанската престолнина, сите знамиња се спуштени на половина копје откако општината прогласи тридневна жалост во вторникот, денот кога почина Де Мигел.
Шпанската фудбалска федерација денеска апелираше да се одложат сите професионални натпревари овој викенд во знак на „почит“ и „хуманост“ по смртта на напаѓачот, што го шокираше фудбалскиот свет.