Врховниот суд на Бразил во среда му нареди на поранешниот претседател Жаир Болсонаро да биде ставен во домашен притвор пред неговото судење за заговор за државен удар, нагласувајќи ја решителноста на судот и покрај зголемените царини и санкции на американскиот претседател Доналд Трамп.
Судијата Александар де Мораес пресуди дека Болсонаро ги прекршил ограничувањата што му се наметнати со тоа што наводно го замолил Трамп да се меша во неговиот случај.
Болсонаро е на суд пред Врховниот суд по обвинение дека се заговарал со своите сојузници за насилно поништување на резултатите од изборите во 2022 година, кои ги загуби од претседателот Луиз Инасио Лула да Силва.
Трамп го нарече процесот „лов на вештерки“ и ги зголеми царините за бразилски стоки за 50 проценти, што стапува на сила утре.
Трамп може да воведе повеќе царини за Бразил
Стејт департментот ја осуди одлуката за домашен притвор, велејќи дека Мораес ги користи бразилските институции за да ја замолчи опозицијата и да ја загрози демократијата, додавајќи дека САД ќе „ги повикаат на одговорност сите што поттикнуваат санкционирано однесување“.
Тие не дадоа детали, иако Трамп рече дека САД би можеле да воведат повеќе царини за бразилски увоз.
Мораес во понеделник донесе одлука со која му забрани на Болсонаро да користи мобилен телефон и да прима посетители, освен адвокати и лица овластени од судот.
Прес-секретарот на Болсонаро потврди дека поранешниот бразилски претседател е ставен во домашен притвор во неговиот дом во Бразилија во понеделник и дека полицијата му го конфискувала мобилниот телефон. Неговите адвокати рекоа дека ќе се жалат на одлуката, тврдејќи дека поранешниот претседател не прекршил никакви судски наредби.
„Правдата е слепа, но не и глупава“
Некои сојузници на Болсонаро се загрижени дека тактиките на Трамп би можеле да им наштетат во Бразил и да предизвикаат проблеми за Болсонаро и да ја охрабрат јавноста да ја поддржи левичарската влада на Лула.
Мореес рече дека поранешниот претседател неколку пати се обидел да ги заобиколи судските одлуки. „Правдата е слепа, но не и глупава“, напиша судијата во својата одлука.
Во изјава по апсењето во понеделник, Болсонаро го нарече Мораес „неконтролиран психопат кој никогаш не се двоуми да притисне посилно“.
Домашниот притвор на Болсонаро би можел да му даде на Трамп изговор да воведе дополнителни мерки против Бразил, рече Грациела Теста, професорка по политички науки на Федералниот универзитет во Парана, додавајќи дека Болсонаро се чини дека намерно ја провоцира ескалацијата.