СДСМ го обвини ВМРО-ДПМНЕ дека не се стреми кон реформи во Изборниот законик, туку кон „изборна кражба“ и манипулација со околу 200 илјади гласови од дијаспората. Опозициската партија рече дека реформската агенда се користи како алиби и дека ќе го заштитат гласот на граѓаните од злоупотреба и манипулација.
„Ја укина техничката влада на сила и без консензус. Откако моделот за електронско гласање на дијаспората не помина, тој се обиде да протурка нов модел за гласање по пошта – повторно без никаква контрола и без гарантирање на волјата на граѓаните. Проблемот е кај владата, кај Мицкоски, кој сака да манипулира со 200 илјади гласови“, велат од СДСМ.
И ВМРО-ДПМНЕ денес ги повика опозициските партии, СДСМ, ДУИ и Левица, да се договорат меѓусебно за Изборниот законик, притоа уверувајќи дека ДПМНЕ ќе прифати сè што ќе побараат, сè додека дијаспората гласа електронски или по пошта.
„Седнете и договорете се за изборна единица, седнете и договорете се за моделот на финансирање, седнете и договорете се за жалбите и како тие би биле прифатливи и, конечно, седнете и договорете се за моделот за декларирање на дијаспората. Сè што ќе ни предложат овие опозициски партии, ние ќе го прифатиме“, додаде Валентин Манасиевски, портпарол на ВМРО-ДПМНЕ.
ДУИ го обвинува ВМРО-ДПМНЕ дека се повлекува од договорот за електронско гласање за дијаспората, барајќи меѓуетнички и меѓупартиски консензус, додека ВЛЕН бара дијаспората да гласа преку безбедна и транспарентна форма, без разлика дали е електронска или по пошта.