Најмалку седум лица загинаа во трагичен напад со оружје во училиште во Тајланд, откако ученик отвори оган а потоа си го одзеде животот, соопшти претставник на тајландската полиција.
Учениците во паника го напуштаа училиштето „Дебсирин Нонтабури“, кое се наоѓа во северозападното предградие на Бангкок, додека повредените беа пренесувани во амбулантни возила, а наставниците се прегрнуваа и плачеа. На фотографиите што ги објавија службите за итна помош се гледа лице на носилка покрај амбулантно возило, додека друго повредено лице добива медицинска помош.
Еден 18-годишен ученик за Ројтерс изјави дека најпрво помислил дека се работи за петарди или за некој што удира по метален предмет. „Воопшто не помислив дека се работи за оружје. Се слушаа многу истрели – бам, бам, бам. Потоа накусо стивна, па повторно почна“, рече тој.
Портпаролот на Националната полиција, потполковник Триронг Пофан, изјави за Ројтерс дека осомничениот напаѓач е меѓу седумтемина загинати. Тој додаде дека 15 лица се повредени.
Министерот за образование Прасерт Џантараруангтонг изјави за Ројтерс дека меѓу загинатите има и наставници и ученици. Полицијата потврди дека напаѓачот бил ученик во училиштето.
Ова е второ пукање во училиште во Тајланд годинава, откако во февруари наставничка беше убиена, а ученик беше повреден при вооружен напад во јужниот дел на земјата.
Спасувачот Кијатихун Верапонгпрадит (47) изјави дека неговиот тим пристигнал додека нападот сè уште траел. Медицинските екипи им укажувале помош на ученици со прострелни рани во грбот, градите и рацете. На горниот кат од училиштето пронашле мртов наставник, а во друга просторија наставничка со прострелни рани во градите и раката. „Ја реанимиравме околу 30 минути и веднаш ја пренесовме во болница бидејќи не можевме да воспоставиме срцев ритам, но направивме сè што можевме“, изјави тој.
Според локалните власти, во учебната 2025 година училиштето броело околу 3.100 ученици и 147 наставници. Заменик-министерот за образование Акраранан Канакитинан соопшти дека ги координира активностите за обезбедување помош за погодените.
Поседувањето огнено оружје и вооруженото насилство не се ретка појава во Тајланд, кој во изминатите шест години беше погоден од низа смртоносни напади, при што меѓу жртвите имаше и деца.