Поп ѕвездата и поранешен член на „Take That“, кој претходно отворено зборуваше за тоа дека има АДХД, откри дека дознал оти е аутистичен за време на неодамнешна сесија со прашања и одговори во Лондон, пренесе Њу Мјузик Едитор (NME).
„Имам АДХД, а штотуку дознав дека имам и малку аутизам, што всушност многу ми се допаѓа бидејќи објаснува многу работи…Сега тоа е мојата ‘карта за излез од затвор’, па за сите чудни работи што ги правам само велам: ‘Извинете, аутистичен сум’.“, изјави тој.
„Со АДХД можете целосно и апсолутно да се концентрирате на нешто 1.000 отсто, но со сè останато едноставно не можете. Прашајте ги моите деца. Она со што сум целосно и апсолутно опседнат е создавањето слики и правењето смешни работи. Кога создавам слики и правам смешни работи, не мислам на себе, бидејќи мојот мозок е неверојатно креативен и може да биде креативен за сè на светот за што се грижите или од што се плашите.“, рече Вилијамс.
„На пример, еве колку сум луд: неодамна седев во авион и си помислив: ‘Што ако можам да имам телекинеза, а моите наметливи мисли му кажат на авионот самиот да се урне… Значи, тоа е нивото на лудило со кое се справувам. Најдобро е да го тренирам мозокот да прави нешто подобро отколку да се грижам дека имам натприродни моќи и дека ќе урнам авион.“, додаде тој.
Вилијамс во минатото отворено зборуваше и за борбата со анксиозноста и депресијата. Минатата година тој објасни дека живее со она што го нарече „Туретов синдром одвнатре“, кој предизвикува „наметливи мисли“.
Во интервју за NME во 2024 година, по повод премиерата на неговиот биографски филм Better Man, Вилијамс уште тогаш навести дека можеби има одредена форма на аутизам, шеговито велејќи дека тоа е „корисна алатка за режисер кој сака да го искористи тоа“.
Вилијамс го објави својот најнов студиски албум, Britpop, во јануари. Потоа со албумот го надмина историскиот рекорд на „Битлси“ за најмногу албуми што стигнале до првото место на британската топ-листа. Ѕвездата претходно призна дека можноста да ја надмине славната четворка е нешто што „повеќе од сè во моментов“ го посакува во својата кариера.
Во меѓувреме, Вилијамс најави и два големи концерти на отворено во Велика Британија и Ирска следното лето. Концертите се закажани непосредно по „Гластонбери 2027“, што предизвика шпекулации дека тој би можел да настапи на фестивалот во Ворти Фарм. Пред неколку години, тој изјави дека верува оти би „растурил“ на престижниот „Legends Slot“ на „Гластонбери“, доколку биде поканет.