Сѐ уште никој не ја тужел државата за загаден воздух, откако пред три месеци беше овозможено тоа право на граѓаните

И по три месеци откако Врховниот суд им овозможи на сите граѓани да ја тужат државата за загаден воздух, никој не го сторил тоа, пренесува САКАМДАКАЖАМ, повикувајќи се на изјава на Управниот суд.

„По извршените проверки во АКМИС системот, ве известуваме дека по донесување на Начелниот став на Врховниот суд од 08.10.2024 година до овој момент, во Управниот суд не се заведени тужби во врска со загадениот воздух“, одговори за САКАМДАКАЖАМ.МК Управниот суд, кај што може да се тужи државата за загадениот воздух што го дишат граѓаните секоја зима.

Веќе подолго време Скопје е на врвот на најзагадени градови во Светот.

Врховниот суд на 8. октомври донесе одлука во која се вели дека граѓанинот не мора во тужбата да го напише виновникот за загадувањето на воздухот, а за тужена странка ќе биде напишана државата Република Северна Македонија. А, потоа задача на Управниот суд ќе биде да го лоцира виновникот за загадувањето.