Американски официјални претставници тврдат дека не станува збор за повторно започнување на војната ниту за крај на примирјето.
Американските воени сили извршија напади врз Иран, таргетирајќи локации за кои се тврди дека биле одговорни за напади врз американските сили, додека Иран, од друга страна, ги обвини САД за прекршување на примирјето.
„Американската Централна команда (CENTCOM) ги неутрализираше дојдовните закани и ги гаѓаше иранските воени објекти одговорни за нападите врз американските сили, вклучувајќи места за лансирање ракети и дронови, локации за команда и контрола, како и разузнавачки, надзорни и извидувачки центри“, соопшти војската.
Fox News објави дека биле гаѓани иранските пристаништа Кешм и Бандар Абас, како и иранскиот поморски контролен пункт Бандар Карган во Минаб. До овие напади, пренесува Fox, дошло откако Иран пред два дена испукал 15 балистички и крстосувачки ракети кон Фуџајра во Обединетите Арапски Емирати, што предизвикало „гнев меѓу земјите од Заливот“.
Американските претставници тврдат дека ова не значи повторно разгорување на војната ниту крај на примирјето. Додале дека Иран лансирал повеќе проектили, дронови и мали пловила додека трите американски разурнувачи „Тракстун“, „Пералта“ и „Мејсон“ минувале низ Ормутскиот Теснец кон Оманскиот Залив.
„CENTCOM не бара ескалација, но останува позициониран и подготвен да ги заштити американските сили“, се додава во соопштението.