Владата ја усвои одлуката за формирање Национален комитет за заштита и безбедност на новинарите, со цел да се обезбеди побезбедна средина за слободно и независно новинарство.
Информацијата ја соопшти портпаролката на Владата, Венера Латифи Азизи, која ја истакна важноста на заштитата на новинарите од закани, напади и притисоци.
Комитетот ќе работи на зајакнување на безбедносните механизми, подобрување на истрагите за нападите врз новинарите и борба против неказнивоста.
Во фокусот ќе биде и заштитата од дигитално насилство, како и од злоупотребувачките тужби СЛАПП, чија цел е да ги заплашат и да ги попречат новинарите во нивната работа.
Во соработка со Советот на Европа, ќе биде изработен Национален акциски план за периодот 2027–2029 година.
Азизи нагласи дека новинарите мора да имаат слобода да поставуваат прашања, да истражуваат и да критикуваат без страв и притисок.
Според неа, заштитата на новинарите значи и заштита на вистината, транспарентноста и демократијата.