Администрацијата на американскиот претседател Доналд Трамп синоќа предложи воведување дополнителни царини од 10 или 12,5 проценти за увоз од 60 земји, вклучувајќи ја и Европската Унија, со цел, како што велат американските власти, да се ограничи трговијата со производи произведени со принудна работа, што ѝ штети на трговијата со САД.
Предлогот на Канцеларијата на трговскиот претставник на САД (USTR) е дел од најновата истрага за нефер трговски практики според Член 301. Овој потег доаѓа во време кога администрацијата на Трамп се обидува да ги врати вонредните царини, кои беа поништени во февруари од страна на Врховниот суд на САД.
USTR објави дека ќе воведе царина од 10 проценти за увоз од ЕУ, Канада, Мексико, Велика Британија, Тајван, Малезија, Пакистан, Бангладеш и неколку други земји, додека дополнителна царина од 12,5 проценти е предвидена за преостанатите 45 земји вклучени во истрагата.
Трговскиот претставник на САД, Џејмисон Грир, изјави дека неактивноста на главните трговски партнери кон производите произведени со принудна работа создава нефер конкурентски услови за американските работници.
USTR, исто така, предложи посебен механизам за текстилниот сектор, кој би дозволил одредени количини облека и текстилни производи да влезат во САД по пониски тарифи.
Соопштението доаѓа пред истекот, на 24 јули, на привремената царина од 10 проценти што администрацијата на Трамп ја воведе на 20 февруари. Во меѓувреме, USTR пред два дена, исто така, предложи царина од 25 проценти за многу бразилски производи, како резултат на истрага за практиките за дигитална трговија и преференцијалните царински политики на Бразил.
Неколку стратешки производи ќе бидат ослободени од новите царини, вклучувајќи енергија, ретки метали, говедско месо, кафе, некои овошја и зеленчуци, фармацевтски производи, органски хемикалии и делови за авиони.