Неизвесноста околу одѕивот на гласачите ги одбележува претседателските избори во Бугарија, каде што до 15 часот на гласање излегле само 15 отсто од запишаните избирачи. Според прелиминарните податоци од излезните анкети на социолошките агенции, ваквата излезност би можела да се вброи меѓу најниските во поновата демократска историја на земјата, објави БГНЕС.
Изборниот ден започнал во 7 часот, а според досегашните информации, гласањето се одвива мирно. Сепак, одѕивот на избирачките места е слаб, без вообичаените редици што се очекуваат за време на избори. На некои места, особено во помалите населени места, членовите на избирачките комисии пријавуваат дека поминувале и часови без да дојде ниту еден гласач.
Првичните информации од теренот укажуваат на слаба заинтересираност за гласање во различни делови од земјата, без поголеми регионални разлики.
Ниската излезност отвора прашања за довербата на граѓаните во политичките партии и институциите, како и за нивната подготвеност да учествуваат во изборниот процес.
Официјалните податоци за излезноста по области ги објавува Централната изборна комисија на Бугарија, додека прелиминарните процени на социолошките агенции ја следат состојбата во текот на изборниот ден.
Конечниот одѕив ќе биде познат по затворањето на избирачките места и обработката на податоците.