Европската унија усвои нов пакет санкции против Русија поради војната во Украина, насочени кон „флотата во сенка“ на Русија, хибридните закани и кршењата на човековите права, потврди високата претставничка на ЕУ за надворешна политика, Каја Калас.
Во објава на X платформата, Калас напиша:
„ЕУ го одобри својот 17-ти пакет санкции против Русија, кој опфаќа речиси 200 бродови од сивата флота. Новите мерки, исто така, се однесуваат на хибридните закани и кршењата на човековите права.
„Ќе има и нови санкции. Колку подолго Русија води војна, толку посилен ќе биде нашиот одговор.“
Претседателката на Европската комисија, Урсула фон дер Лајен, изјави дека 18-тиот пакет санкции против Русија веќе се подготвува. Иако ЕУ штотуку го усвои својот 17-ти пакет мерки, фон дер Лајен објави дека се работи на понатамошни построги мерки.
„Време е да се зголеми притисокот врз Русија за да се постигне прекин на огнот“, рече таа за мрежата X по телефонскиот разговор со Володимир Зеленски.