Семејствата на тројцата загинати во трагичната сообраќајна несреќа на делницата од автопатот Скопје – Блаце го ангажираа адвокатот Арианит Кочи за нивно застапување во правните постапки и за целосно расчистување на случајот.
Кочи информираше дека заедно со семејствата на жртвите Ејуп Тернава, Џенет Тернава и Фатмире Шабани престојувал во Полицијата на Северна Македонија, каде, според неговите зборови, не добил одговори на неколку клучни прашања поврзани со несреќата што се случи на делница која официјално била затворена за сообраќај.
Според адвокатот, сè уште остануваат неразјаснети прашањата која компанија ја градела оваа делница од автопатот, кој вршел надзор над изградбата и кој бил одговорен за нејзиното обезбедување.
Тој бара објаснување и зошто влезот на затворената делница не бил физички блокиран, со што било овозможено возилото да навлезе до крајот на патот, каде што завршило во јама.
Кочи посочува дека по несреќата, влезот на оваа делница бил затворен со чакал и биле поставени сообраќајни знаци, што според него отвора прашање зошто истите мерки не биле преземени пред да се случи трагедијата.
Адвокатот додава дека досега нема информации дека некое лице е приведено во врска со случајот.
Во своето обраќање, тој го отвори и прашањето за трошоците на семејствата, кои, како што наведува, платиле 2.800 евра за транспорт на телата на загинатите од Македонија во Косово.
Кочи смета дека најмалку овој трошок требало да биде покриен од државата.