Шеснаесет ученици загинаа во пожар во интернатско училиште во Гилгил, околу 120 километри западно од кенискиот главен град Најроби, изјавил полицаец за новинарите на местото на настанот.
Уште 74 ученици се хоспитализирани со повреди, додал тој.
Пожарот во училиштето за девојчиња „Утумиши“ започнал во раните утрински часови во четврток, додека учениците спиеле, соопштија Кенискиот Црвен крст и полицијата.
Полицијата наведува дека се спроведуваат операции за пребарување и спасување, а властите сè уште ја утврдуваат причината за пожарот. Кенискиот Црвен крст соопшти дека итните служби се на терен и укажуваат помош.
„Станува збор за тажна и вознемирувачка ситуација“, изјави полицискиот командант Масуд Муини, обраќајќи им се на родителите и на насобраните пред училиштето.
Пожарите не се реткост во кениските интернатски училишта, а во последните години се пријавени повеќе смртоносни инциденти. Многу од нив се резултат на намерно подметнување пожар, при што се сомничат незадоволни ученици поради дисциплината и условите за живот, додека други настанале случајно.
Пренатрупаноста во студентските домови и непочитувањето на безбедносните правила, како што се блокирани излези и заклучени прозорци, често се наведуваат како причина за големиот број жртви.
Според полицијата, пожарот во Гилгил избувнал околу 01:00 часот по локално време и зафатил дом со околу 220 ученици.
Муини изјавил дека некои ученици во паника избегале во околните области и сè уште се трага по нив.
„Во моментов нашите службеници ја пребаруваат областа, бидејќи некои ученици во текот на ноќта побегнале во шок и страв“, рече тој.
Тој додаде дека истрагата е во тек, а училиштето е оградено и дозволен влез имаат само родителите.
Вамбуи Ндериту, чиј братучед учи во училиштето, изјавила дека семејствата што пристигнале на местото биле дочекани со хаос и страв.
„Кога пристигнавме во училиштето, ни рекоа да чекаме во ред. Повеќето од нас беа многу загрижени затоа што слушнавме дека некои ученици загинале, а други се повредени и во болница“, рекла таа.
Таа додала дека дел од учениците се повредиле скокајќи од горниот кат на домот во обид да се спасат.
„Некои од учениците од горниот кат морале да скокаат надвор, затоа и се повредени“, изјавила таа.
Ндериту додала дека нејзиниот братучед го преживеал пожарот, но има скршена нога.
Кенија има долга историја на училишни пожари, а најсмртоносниот се случил во 2001 година, кога загинале 67 ученици во округот Мачакос, откако некои ученици намерно запалиле дом.
Во 2024 година најмалку 21 лице загинаа во пожар во интернат во централна Кенија, а слични инциденти во 2022 и 2017 година исто така предизвикаа жртви и уништување.
Во ноември 2021 година, Министерството за образование соопштило дека имало 126 случаи на подметнати пожари меѓу јануари и ноември 2020 година.
Агенцијата Ројтерс цитира истражување од 2018 година според кое во таа година биле регистрирани 60 случаи на подметнати пожари.