Дваесет и двајца будистички монаси се приведени во полиција во Шри Ланка откако царинските службеници на главниот меѓународен аеродром во Коломбо пронајдоа 110 килограми висококвалитетен канабис во нивниот багаж.
Според „Гардијан“, тие биле претежно помлади монаси на обука од храмови низ Шри Ланка, а властите велат дека секој од нив имал околу пет килограми дрога скриена во лажни багажни прегради во нивните куфери.
Монасите се враќале од четиридневно патување во Бангкок, а дрогата била пронајдена по нивното враќање на меѓународниот аеродром Бандаранаике во саботата. На социјалните мрежи се појавија и снимки на кои се гледа како се обидуваат да ги сокријат лицата зад мантиите на аеродромот.
По нивното апсење, тие биле предадени на полицијата, а потоа изведени пред судија во неделата.
Според властите, ова е најголемата поединечна заплена на овој вид дрога некогаш регистрирана на главниот меѓународен аеродром во јужноазиската земја. Вредноста на пронајдената дрога била проценета на околу 1,1 милијарда шриланкански рупии, или приближно 2,5 милиони фунти.
Локалниот весник „Дејли њуз“ објави дека патувањето на монасите наводно било спонзорирано и дека фотографии од групата на одмор во цивилна облека биле пронајдени во нивните телефони.
„Гардијан“ исто така објави дека е уапсен 23-ти монах, за кој полицијата верува дека го организирал патувањето. Тој не патувал со групата, но подоцна бил приведен во предградие на Коломбо. Според полицијата, тој им рекол на другите монаси дека пакетите за кои станува збор се „донации“ и дека ќе дојде комбе да ги подигне.