Штипскиот гимназијалец Даниел Христов освои бронзен медал на престижната Менделеева олимпијада по хемија, натпревар на кој учествуваат најдобрите млади хемичари од целиот свет, соопштија од СОУ „Славчо Стојменски“ – Штип.
Од училиштето информираат дека овој успех е резултат на неговиот долгогодишен труд, посветеност и љубов кон науката. Воедно потенцираат дека Христов достојно ја претставил гимназијата и покажал дека знаењето и упорноста носат врвни резултати.
„Со особена гордост го истакнуваме успехот на нашиот ученик, кој освои бронзен медал на ова престижно натпреварување. Честитки за извонредното достигнување и нека ова биде само почеток на неговите идни успеси“, велат од гимназијата.
Менделеевата олимпијада по хемија важи за една од најстарите и најпрестижни меѓународни натпреварувања во оваа област, а годинава се одржа во Москва, Русија.