Охридскиот регион станува сè поатрактивна дестинација за европските туристи, откако утрово на охридскиот аеродром слета првиот авион на новата редовна линија од полскиот град Вроцлав. Оваа историска врска, заедно со претстојниот лет од Катовице закажан за во вторник, означува сериозна офанзива за привлекување полски туристи и силен импулс за локалната економија.
Заменик-претседателот на Владата и министер за транспорт, Александар Николоски, денеска од Охрид порача дека овие дестинации носат огромна додадена вредност која не е само сезонска, туку отвора долгорочни перспективи за бизнис и развој.
„Охридскиот аеродром целосно се отвора кон Полска. Ова се две значајни рути кои ќе овозможат полските туристи да го посетат не само Охрид, туку и Струга и Дебрца. Сакаме локалните економии тука да растат, а овие летови да донесат дополнителна вредност за целиот регион“, истакна Николоски, додавајќи дека приказната се заокружува со обновувањето на сезонските линии од Белград и Истанбул кон Охрид.
Аеродромите со рекорден раст во регионот
Македонскиот авиосообраќај бележи незапамтен бум. Според вицепремиерот Николоски, домашните аеродроми имаат највисока стапка на раст во целиот регион.
Резлутати во бројки: Во периодот јануари-мај оваа година, регистриран е раст од неверојатни 31,2% во споредба со истиот период минатата година.
Нови цели: По минатогодишниот успех со надминување на границата од 3 милиони патници, со ова темпо веќе годинава ќе се достигне бројката од 3,5 милиони патници.
Николоски упати благодарност до менаџментот на ТАВ и до пратениците во Собранието кои даваат поддршка на владините политики за развој на авиосообраќајот, најавувајќи ја и следната амбициозна цел.
„Со ова темпо, си поставуваме нова цел – за неколку години да достигнеме 4 милиони патници годишно. Тоа би бил врвен успех за нашите два аеродроми, особено ако се земе предвид дека бројот на патници далеку ќе го надмине вкупниот број на жители во државата“, заклучи вицепремиерот.