Четири ирански танкери натоварени со околу 7 милиони барели сурова нафта го преминаа Ормускиот Теснец, и покрај блокадата што Соединетите Американски Држави ја воведоа кон иранските пристаништа. Според компанијата за следење на поморскиот сообраќај Kpler, станува збор за бродовите Hilda I, Amber, Silvia I и Happiness I, кои биле натоварени на главниот ирански нафтен терминал на островот Харг.
Бродовите го преминале теснецот во понеделник со исклучени транспондери, а нивните движења биле идентификувани преку сателитски снимки. Вообичаено, овие танкери транспортираат нафта кон области во близина на Малезија и Сингапур, каде товарот се префрла на други бродови, често со крајна дестинација Кина.
Експертите оценуваат дека ова е еден од начините што Иран ги користи за да ги заобиколи американските и европските санкции. Во меѓувреме, американската војска продолжува со операциите за спроведување на блокадата, соопштувајќи дека само оваа недела неутрализирала уште еден танкер кој се обидувал да стигне до иранските терминали. Според американските власти, тоа бил шестиот оштетен брод од воведувањето на блокадата.