Американската пејачка и текстописец Тејлор Свифт изјави дека тоа што ќе влезе во историјата како најодликувана добитничка на музичките награди Билборд е „најдобриот подарок за ран роденден“ за неа.
Поп-ѕвездата освои 10 награди, вклучувајќи го и најдобриот уметник и најдобриот албум на Билборд 200 за „The Tortured Poets Department“, за 49 награди во кариерата.
„Ова е најдобриот подарок за ран роденден што можевте да ми го дадете, па ви благодарам многу. Го сакам, тоа е токму она што го сакав“, рече Свифт во претходно снимениот говор пред нејзиниот 35-ти роденден.
Наградите доаѓаат откако таа ја заврши својата рекордна турнеја „Eras“ во неделата, која доминираше во вестите во текот на 21-месечниот период.
„За сè што е поврзано со турнејата „Eras“ и албумот „The Tortured Poets Department“, само треба да ви се заблагодарам. Тоа ми значи се, значи дека ја прифативте мојата работа и многу ми значи што толку се грижите за мојата музика“, рече таа обраќајќи им се на своите обожаватели.
Многу награди добија и британските ѕвезди како Дуе Липа и Колдплеј.
Меѓу добитниците на наградите се раперот Дрејк, кој беше прогласен за најдобар рап изведувач, најдобар машки рап изведувач и доби признание за најдобар рап албум „For All The Dogs“. Доја Кат е најдобра рап пејачка, а наградата за најдобра рап песна ја доби Кендрик Ламар за песната „Not Like Us“.
Наградата за најдобар нов музички уметник отиде во рацете на американската пејачка и текстописец Шапел Роан, која рече дека и било потребно долго време да се пробие во музичката индустрија.
Билборд е американски неделник посветен на музичката индустрија, основан во Синсинати во 1894 година. Се смета за еден од најрелевантните и најнепристрасни извори на информации за музичката индустрија. Неделно објавува некои од најважните меѓународни топ листи на најпопуларните песни и албуми во различни категории.
Забележителни се Billboard Hot 100, кој ги рангира 100-те најпопуларни песни без оглед на жанрот и се користи во САД како стандарден показател за физичка и дигитална продажба и радио емитување, додека Billboard 200 е сличен показател за продажба на албуми.