Теодор Јовевски го фати крстот во Скопје, Гоџо од Варош најсреќен во Охрид

Денеска низ целата држава се осветуваат водите и се фрла крстот за време на големиот верски празник Богојавление Водици. Неколку минути после пладне се осветија водите на Вардар во Скопје, и се фрли крстот, а најсреќен верник беше Теодор Јовевски кој прв стигна до светиот крст.

„Првпат се фрлам по крстот и ми се посреќи. Се надевам дека ќе ми донесе среќа, а на другите верници ќе им порача да веруваат во Бога“, рече Јовевски.

Во Охрид Светиот крст го фати Мартин Гоџоски од охридската населба Варош. Тој вторпат го фаќа крстот кој беше фрлен во водите на Охридското Езеро, откако првпат беше среќен верник во 2022 година.

На манифестацијата присуствуваше и претседателката Гордана Силјановска Давкова, која потоа замина во Струга.

Бојан Јовевски го извлече крстот од осветените води на Крива Река во Крива Паланка.

Крстот во Тетово го фати Борче Стефановски, а во Дебар најсереќен беше десетгодишниот Павел Ангеловски.

Јован Илиевски го извади светиот крст од водата во базенот во црквата „Свети Никола“ во Куманово. Во Штип најсреќни беа Александар Стојановски и Петар Мијалков.