Учениците од Тетово од денеска ќе имаат на располагање уште една активност по предметот физичко воспитание. Тие ќе имаат можност да ги следат првите часови по пливање. Агенцијата за млади и спорт денеска го изврши примопредавањето на затворениот базен, прв од 14 што ќе се градат во Македонија.
Касами вели дека општината веќе е во преговори со АМС и дека до крајот на годинава се очекува да започне уште еден проект за изградба на атлетско игралиште.
„Станува збор за проект реализиран од Агенцијата за млади и спорт. Ние како општина имаме неколку барања од граѓани за реализација на други спортски проекти, особено за училишни спортови. Еден од нив е за изградба на патека за трчање која беше барање на атлетските клубови. Но, тука ќе има и повеќенаменско игралиште и патека за други спортови“, вели Биљал Касами.
Главниот дел на кој е поставен базенот е долг 25 метри, широк 9 метри и длабок од 0.80 до 1.20 метри. Проектот е финансиран од Агенцијата за млади и спорт и тежи 43 милиони денари.