Тетовскиот театар и библиотека во финансиски грч – само 1.6% од потребниот буџет за 2025 година

За тетовскиот театар и библиотека за 2025 година  се издвоени само 15 милиони денари, или само 1,6 % од средствата потребни за реализација на проектот на објектот. Тоа значи дека доколку Владата и Министерството за култура секоја година издвојуваат толку средства,за Тетовскиот театар ќе  бидат потребни цели 66 години за да се  заврши. Додека рокот даден од министерството, според договорот, е крајот на 2026 година.

Вршителот на должност, директор на Центарот за култура во Тетово, кој раководи со овој проект, вели дека досега Министерството за култура од 2021 година издвоило само 412 милиони денари или околу 30 отсто од потребните средства.

„Гледајќи го целокупниот период, ние сме на 30% од буџетот за тој проект. Прелиминарната сума изнесува приближно 1 милијарда денари, 900 милиони денари, додека министерството кога требаше да го затвориме овој проект издвои само 15 милиони денари за театарот, што е околу 1,6% од  100%. Односно, за 2025 година се предвидени само 15 милиони денари. Само 15 милиони денари, смешно симболична сума. Што значи дека недостасуваат милијарда денари за завршување, буџетирање, на тој проект. Значи дека за 2025-26 година, ако треба да го затвориме тој проект, владата треба да предвиди 500 милиони денари, конкретно за двете години, а не 500 милиони денари, туку Владата предвидела 15 милиони денари, сума која значи  дека нема да се реализира“, вели Фатлинд Ајдини.

Прашавме во Министерство за култура но не добивме одговор.

Но, една од причините за доцнењето на изградбата на Театарот и библиотеката, како што изгледа, е злоупотребата за незаконски придобивки.

Основното јавно обвинителство за гонење организиран криминал и корупција пред неколку месеци поднесе кривична пријава против фирма и три лица за злоупотреба при изградбата на објектот.

Според обвинението, во периодот од 2014 до 2020 година, сопственикот и менаџерот на компанијата С.Ш., во соработка со Х.Ф., тогашниот директор на Центарот за Култура “Иљо Антески-Смок” во Тетово, и А.А., претседател на Комисијата за јавни набавки, а подоцна и вршител на должност во Центарот за култура манипулирале со регулативите и процедурите за јавни набавки. Тие се сомничат дека ја злоупотребиле својата службена должност и овластување, овозможувајќи незаконски придобивки за вклучената компанија во вредност од над 832 милиони денари.