Има ли и колкави се изгледите да се формира трет фронт од партиите кои сѐ уште немаат склучено предизборна коалиција, во случајов АА, блокот на Села, ЕДП и Народното Движење? Аријанит Хоџа од Европска демократска партија, вели дека во политиката никогаш не може да се исклучат различни опции, но уверува дека досега немал комуникација за „третиот фронт“. Додава дека ЕДП ќе биде дел од оној фронт што ќе го бетонира европскиот пат на земјата.
„Во политиката никогаш не можете да ги исклучите опциите. Ако вашето прашање е насочено кон тоа дали е дискутирано на оваа тема, тогаш не. Не е разговарано и не сме имале никаков контакт. Мислам дека во период кога Алијанса за Албанците се соочува со процес кој неминовно ќе заврши пред судските инстанци, мислам дека не е коректно некој да дава вакви коментари или да влегува во каква било комуникација за прашања кои се однесуваат на коалиција“, вели Аријанит Хоџа.
Пратеникот на Алијанса за Албанците, кој го поддржува таборот на Села, вели дека за секоја одлука што ќе ја донесе АА мора да помине низ филтрите на дискусија во партијата. Одлуката за тоа како ќе излезат на изборите ја најави за 18 февруари, кога ќе се одржи Конгресот на партијата.
„Алијанса за Албанците нема да донесе одлука која нема да ги помине сите филтри на дискусија, од членството, поддржувачите, па сѐ до она што се нарекува најголемо или најмоќно тело меѓу двата конгреса, а тоа е Централното собрание, особено сега кога имаме конгрес на 18 февруари, каде всушност може да се отвори дебата за да се види што мислат конгресмените“, порача Ремзи Мемеди.
За гласините за формирање „трет фронт“, слушнал и претседателот на Народното движење, Скендер Реџепи, но тој за ТВ21 вели дека оваа опција не би била поволна за Албанците. Додава дека како политички субјект или ќе соработуваат со позицијата или со опозицијата, трета опција за нив нема!
„Слушнав за тоа како информација, но немам никаква комуникација во оваа насока и сметам дека не би било корисно. Претпочитам да го задржам првичниот став дека Албанците ќе имаат поголем успех на изборен терен доколку се во два блока, но на крајот не можеме да му забраниме на ниту еден политички субјект за тоа како ќе настапи. Верувам дека ние како Народно движење ќе донесеме одлука меѓу позицијата и албанската опозиција, затоа што во таа насока го водевме разговорот во органите на Народното движење. За нас, трета опција нема да има простор“, порача Скендер Реџепи.
И првиот човек на Движењето Беса, Биљал Касами, е на став дека на Албанците не им се потребни повеќе од два блока. Гостувајќи во емисијата „Клик Плус“, Касами рече дека Али Ахмети ќе се обиде и со поширок фронт, бидејќи многу партии му се приклучија на опозицискиот фронт.
„Не верувам дека ќе има, затоа што на ДУИ денес и требаат сите кои ѝ служеле на различни позиции, да ѝ служат и сега со обединување, создавајќи фиктивен фронт. Ако успеавме да обединиме четири политички субјекти, заедно со Самоопределување пет, тогаш на Али ќе му треба бројна предност каде што вели дека сме шест или седум. Она што можеме да го кажеме со голема сигурност е дека Албанците на овие избори ќе имаат два блока, ЕСП и Сојузот на Али Ахмети“, вели Биљал Касами.
Од вкупно осум албански политички партии, три од нив договорија соработка за заедничко учество на изборите на 8 мај. Алтернатива, Движењето Беса и Демократското движење го сочинуваат Европскиот сојуз за промени. На овој сојуз наскоро официјално ќе му се приклучи и Арбен Таравари, кој формално сѐ уште е претседател на АА, но се очекува да биде разрешен од блокот на Села. Од друга страна, пак, Европскиот фронт засега го сочинува само ДУИ, од каде упатија повици за соработка до сите политички партии.