Од 1 јули, на позитивната листа на лекови се вклучени три нови лекови против згрутчување на крвта – еноксапарин, надропарин и ривароксабан. Овие лекови сега се достапни во аптеките и ќе се земаат со упат од специјалист, плаќајќи само партиципација, соопшти директорот на Фондот за здравствено осигурување, Сашо Клековски.
„За еноксапаринот се достапни два бренда, за надропаринот е достапен еден бренд, додека за ривароксабанот во почетната фаза ќе биде достапен еден бренд. Што значи ова? Првите два антикоагуланси досега беа достапни со рефундација. Отсега ќе бидат на позитивната листа и ќе се издаваат со рецепт од лекар специјалист. Овие два антикоагуланси чинеа од 1.100 до 2.700 денари, во зависност од дозата и количината на терапијата. Сега пациентите ќе ги земаат само со партиципација од 160 до 240 денари“, изјави Сашо Клековски, директор на Фондот за здравствено осигурување.
Клековски рече дека е претерана употребата на Клексаните против згрутчување на крвта и дека треба да се внимава при давањето на антикоагулантите.
„Постои донекаде претерана употреба на лековите и тоа ќе треба да се стави во построга рамка, со јасно утврдување на индикациите според кои тие можат да се препишуваат. Сепак, конечната одлука, врз основа на медицинските индикации, ја носи лекарот специјалист. Лекарот специјалист одлучува дали лекот ќе биде препишан или не. Што се однесува до еноксапаринот и надропаринот, тие ќе продолжат да бидат достапни за болничко лекување, бидејќи се лекови што се користат во болнички услови. Сега тие ќе се користат и како продолжение на болничкото лекување, односно во домашни услови“, изјави Сашо Клековски, директор на Фондот за здравствено осигурување.
Овие лекови минатата година беа најавени дека ќе бидат вклучени на позитивната листа до 1 јануари 2026 година, но одложувањето на овој процес, според Клековски, се случило поради административни причини.