Цената на дизелот се намалува за 2,5 денари, а на бензините за 1,5 денар за литар – одлучи Регулаторната комисија за енергетика. Регулаторната комисија со денешната одлука ги утврди највисоките цени на горивата, кои се намалуваат во просек за 2,73%. Максималните цена за дизелот е 95,5 денари, за БС 95 е 82 денари, а за БС -98 цената е 84 денари. Но, во овие цени не е вкалкулиран дополнителниот попуст од Окта за трговците, од 3 денари за дизелот и 2 денари за бензините.
Од 15.4.2026 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 82,00 (денари/литар)
Моторен бензин ЕУРОСУПЕР БС – 98 84,00 (денари/литар)
Дизел гориво ЕУРОДИЗЕЛ БС (Д-Е V) 95,50 (денари/литар)
Масло за горење Екстра лесно 1 (ЕЛ-1) 96,50 (денари/литар)
Мазут М-1 НС 49,227 (денари/килограм)
Со попустот, од ноќеска на полноќ дизелот на бензиските пумпи треба да се продава по 92,5 денари за литар, наместо по 95 денари како сега, цената на ЕУРОСУПЕР БС – 95 ќе биде 80 денари наместо 81,5 денари, а ЕУРОСУПЕР БС – 98 ќе се точи по 82,наместо по 83,5 денари.
Цена на горивата од ноќеска на полноќ со вкалкулирани мерки и попусти
Моторен бензин ЕУРОСУПЕР БС – 95 80,00 (денари/литар)
Моторен бензин ЕУРОСУПЕР БС – 98 82,00 (денари/литар)
Дизел гориво ЕУРОДИЗЕЛ БС (Д-Е V) 92,50 (денари/литар)
Овој пат и владините пресметки се совпаднаа со тие на Регулаторна. Но, иако беше најавено дека на владината седница ќе разгледа извештајот на пазарните инспектори за движењето на цените на храната, и ќе се носат нови таргетирани мерки за заштитата на стандардот на граѓаните, сепак премиерот вели уште ќе се анализира.
„Јас инаку нема да ја водам денешната седница на Владата поради други обврски кои што ги имам. Инаку, очекувам да го добијам извештајот и да го изанализираме овие денови и откако ќе го анализираме многу внимателно, тогаш сигурно ќе излеземе со одредени мерки. Сакаме тие да бидат овој пат микротаргетирани“, рече Мицкоски.
Најавите на премиерот беа дека следните мерки би биле повеќе таргетирани, за одредени целни групи на граѓани и за основните прехранбени производи. Или комбинација со намалување на Данокот на додадена вредност, но и со ограничување на профитната маржа за трговците.
Инаку, статистика измери дека во март годинава инфлацијата се искачи на 4,9 проценти во однос на март лани. Трошоците за храна и безалкохолни пијалоци пораснале за 7,5 проценти. Во однос пак на февруари, таа е повисоки за 0,7%.