Центарот за управување со кризи (ЦУК) информира дека во текот на изминатото деноноќие, до 07:30 часот, на територијата на Македонија биле регистрирани вкупно 20 пожари на отворен простор.
Според најновиот извештај, во моментов активен е само еден пожар, еден е ставен под контрола, додека 18 пожари се целосно изгаснати.
Единствениот активен пожар е во општина Македонски Брод, кај селото Грешница, на месноста Стојанова Населба, каде гори ниска вегетација, деградирана шума и грмушки.
Под контрола е пожарот на депонијата во Делчево, а надлежните служби продолжуваат да ја следат состојбата.
Во меѓувреме, пожарникарите успешно интервенирале и ги изгаснале останатите 18 пожари, кои биле регистрирани во повеќе општини низ државата, меѓу кои Карпош, Петровец, Бутел, Битола, Богданци, Прилеп, Долнени, Кавадарци, Неготино, Виница, Зрновци, Липково, Кратово, Ранковце, Желино, Теарце и Гостивар.
Најголемиот дел од изгаснатите пожари зафатиле ниска вегетација, стрништа, диви депонии, грмушки и ѓубришта, а во неколку случаи биле зафатени и шумски површини.
Од ЦУК апелираат до граѓаните да бидат внимателни при движење и престој во природа и да не палат оган на отворен простор, со цел да се спречат нови пожари, особено во услови на високи температури.