Десетици илјади Палестинци почнаа да се движат по главните патишта северно кон Газа во понеделникот додека Израел ги укина блокадите на патиштата откако милитантната група Хамас се согласи да го предаде израелскиот заложник Арбел Јехуд и уште двајца заложници.
Видеата покажаа големи толпи луѓе во движење, а очевидци рекоа дека првите жители пристигнале во градот Газа рано наутро, откако првиот премин во центарот на Газа беше отворен во 7 часот наутро. Во 9 часот треба да се отвори уште еден премин.
Кога почнаа да стигнуваат вести дека премините ќе бидат отворени, илјадници раселени семејства се радуваа во засолништата и шаторски кампови.
„Нема спиење, имам сè спакувано и подготвено да одам на првото разденување“, рече Гада, мајка на пет деца.
„Барем се враќаме дома, сега можам да кажам дека војната е завршена и се надевам дека ќе остане мирно“, изјави таа за Ројтерс преку апликација за разговор.
Според условите на договорот за прекин на огнот, жителите на северна Газа требаше да се вратат викендов, но Израел рече дека Хамас го прекршил договорот со тоа што не го ослободил цивилниот заложник Јехуд и ги задржал премините затворени.
Доцна во неделата, катарските посредници рекоа дека Хамас се согласил да ги ослободи Јехуд и уште двајца заложници и дека Израел за возврат ќе им дозволи на раселените Палестинци да се вратат во северниот дел на Појасот Газа почнувајќи од понеделник наутро.
Израелскиот премиер Бенјамин Нетанјаху во неделата потврди дека Хамас ќе ги ослободи Јехуд, војникот Агам Бергер и уште еден заложник.