Владата треба да ги усвои анти-ковид мерките – Најчевска: Не е прекршок ако се контролираат домовите

Заштитата на здравјето на граѓаните е многу поважно отколку нарушувањето на нивната приватност. Затоа, Владата може да ја усвои предлог мерката на Комисијата за заразни болести граѓаните во своите домови да не примаат повеќе од 4 гости, оценува универзитетската професорка за човекови права, Мирјана Најчевска. Таа смета дека препораката има за цел да испрати сигнал до граѓаните, дека најголемиот број заразени е резултат од домашните собири и тие треба да се забранат.

Таа зборуваше и за мерката за носење маски. Смета дека таа мерка не ги загрозува граѓаните кога се на отворено и кога се сами, бидејќи сега почнува сезона на загаден воздух, граѓаните самоиницијативно треба да носат маска.

Инаку министерот за здравство Венко Филипче е убеден дека секој граѓанин кога ќе излезе од дома треба да носи маска. Целта е, како што рече да се избегнат несовесни групирања без да се почитува дистанца и без носење маски.

Во пакетот мерки кои треба да ги усвои владата е забраната за групирање на отворено по 22 часот, групирања во паркови и внатрешни простории. Маска треба да носат и хронично болните кога се во затворен простор, а не треба да носат само лицата кога спортуваат и децата до 6 годишна возраст.