Употребата на климатизација во автомобил во одредени ситуации може да доведе до парични казни во неколку европски земји, особено ако возачот го остави моторот вклучен исклучиво за ладење на кабината додека возилото стои.
Во Германија, возачите кои непотребно го држат моторот вклучен за да користат климатизација можат да бидат казнети до 80 евра. Германските прописи за сообраќај и заштита на животната средина забрануваат непотребно работење на моторот и емисии што можат да се избегнат, а ваквата пракса се применува и во ситуации кога возилото стои во место, а моторот работи само поради климатизација. Иако клима-уредот не е директно наведен во законот, се толкува преку одредбите за непотребно работење на моторот.
Возачите на електрични возила во оваа ситуација се во предност, бидејќи климатизацијата работи независно од мотор со внатрешно согорување.
Во Италија важат значително построги правила, каде казните за оставање на моторот вклучен поради работа на климатизацијата во паркирано возило или за време на застој во сообраќајот се многу повисоки. Според важечките прописи, паричните казни се движат од 223 до 444 евра. Италијанскиот закон ваквата пракса ја забранува уште од 2007 година, а дополнително е заострен во 2022 година со зголемување на казните, пишува „Феникс“.
Иако климатизацијата во возилото претставува стандардна опрема и значително ја зголемува удобноста при возење, во поединечни држави нејзината употреба заедно со непотребно работење на моторот може да резултира со сериозни парични санкции. Затоа на возачите им се препорачува претпазливост, особено при патување во странство.