„За 12-15 месеци готова салата Партизан во Чаир“: Ганиу вели средствата ги одвои Владата и министерството за спорт

Салата Партизан во Чаир со години е демолирана и неупотреблива.
Неодамна таму имаше фрлено ѓубре од непознати лица.
Сега сметот е отстранет, како што вели градоначалникот на Чаир, Висар Ганиу, а започнати се работите за санирање на салата.
Ганиу вели дека финансиските средства се издвоени од Владата и Министерството за спорт, а вкупниот проект со ДДВ ќе чини 100 милиони денари.

-Ова е прва фаза на која се работеше и од овој објект се отстранети околу 170 кубни метри отпад. Така, во оваа фаза од буџетот на Владата се издвоени средства за изминатата година, 25 милиони денари со вклучен ДДВ, а во следните две години ќе бидат издвоени 37 милиони денари, односно и од Министерството за спорт, кое е под капата на Владата, изјави градоначалникот на општина Чаир, Висар Ганиу.

Додека бевме таму не се работеше поради празникот, но Ганиу рече дека другите денови интензивно работат и се очекува салата да биде готова за неполни 2 години.

-Изведувачот има договор со кој мора да ја заврши работата за 24 месеци, но од нив добивме ветување дека ќе го завршат многу порано бидејќи интензивно работат и затоа очекуваме се да биде завршено во рок од 12 до 15 месеци за оваа спортска сала, изјави градоначалникот на општина Чаир, Висар Ганиу.

Инаку, пред неколку дена заедно со Гани оваа сала ја посетија министерот за спорт, Борко Ристевски и заменик министерот Сафије Садики Шахини.