Украинскиот претседател Володимир Зеленски објави дека Русија извршила масовен напад преку ноќ врз Днепар, Одеса и други региони на земјата, користејќи 524 дронови и 22 балистички и крстосувачки ракети.
Според него, нападите оштетиле станбени згради, енергетска инфраструктура и кинески брод во Одеса, додека десетици луѓе биле повредени, вклучувајќи и деца.
Зеленски повика на итно зајакнување на системите за воздушна одбрана и противбалистички ракети во Украина и Европа.
„Повеќе од 6 часа во текот на ноќта траеше рускиот напад врз Днепар и регионот. Со ракетен удар е оштетена станбена зграда, а има и значителни разурнувања на друга цивилна инфраструктура. Во регионот беа погодени енергетски објекти и станбени куќи. Имаше напади со дронови во Одеса, а еден од беспилотните летала удри во брод што ѝ припаѓа на Кина. Русите не можеле да не знаат за кој брод станува збор во морето. Вкупно, имаше разурнувања во осум региони, а според досегашните информации, низ целата земја има десетици повредени, меѓу кои и деца.
Вкупно, Русите во овој напад употребија 524 ударни дронови и 22 ракети од различни типови – балистички и крстосувачки. Во многу погранични и фронтовски заедници тревогата сè уште трае, но секаде каде што безбедносната состојба дозволува, нашите служби работат. Русија се потпира на балистички ракети за да напаѓа луѓе, и токму затоа мораме во Европа да направиме сè за да постои сигурна заштита од тоа. Европа мора да има сопствени антибалистички системи и да биде самодоволна против овие закани. Повторно нагласуваме: потребна нѝ е сопствена антибалистичка одбрана и зајакнување на украинската противвоздушна одбрана уште сега. Оваа недела е посветена на работа со партнерите за зајакнување на заштитата на животите. Благодарност до сите што веќе работат на ова заедно со Украина.“, напиша Зеленски.