Италија соопшти дека беспилотното летало, соборено над Литванија од италијански борбен авион во рамките на мисија на НАТО, најверојатно потекнувало од Русија. Италијанскиот министер за одбрана Гвидо Крозето изјави дека леталото било соборено кратко по полноќ. Портпаролот на литванскиот Национален центар за управување со кризи претходно изјави дека леталото било соборено во близина на селото Праткунаи во јужна Литванија, недалеку од Каунас, вториот по големина град во земјата.
Нешто претходно, беше издадено и предупредување поради појава на беспилотно летало над главниот град Вилњус и околниот регион. Борбени авиони од мисијата на НАТО за воздушна одбрана на Балтикот патролираат низ воздушниот простор на Латвија, Литванија и Естонија уште од моментот кога овие земји се приклучија кон Алијансата во 2004 година. Оваа година, авиони од таа мисија веќе соборија залутани украински беспилотни летала над Естонија во мај, како и над Латвија во јуни и август.
Сè почестите инциденти со воени беспилотни летала во воздушниот простор на земјите што граничат со Русија дополнително ја зголемија загриженоста дека војната во Украина би можела да се прелее преку границите на НАТО. Во последните месеци, Украина ги зачести нападите со беспилотни летала врз Русија, вклучително и во регионот на Балтичкото Море. Досега, неколку украински воени беспилотни летала навлегле во воздушниот простор на Финска, Латвија, Литванија и Естонија.
Украинските власти за ваквите инциденти ја обвинуваат Русија, тврдејќи дека руските системи за електронско војување ги попречуваат навигациските системи и ги менуваат траекториите на беспилотните летала.