Главниот адвокат на Трамп, Тод Бланш, објави дека ФБИ располага со нови информации за напаѓачот кој се обиде да го убие Доналд Трамп на предизборен митинг во 2024 година. Нападот се случи во Батлер, Пенсилванија, а Бланш ја потврди веста на прес-конференција во Белата куќа, пренесува Ројтерс.
„Станува збор за нови сознанија за напаѓачот, неговото потекло и минато – работи што претходно не ги знаевме“, им рече Бланш на новинарите, иако не изнесе дополнителни детали.
Објавата на Бланш уследи само неколку часа откако Трамп на социјалните мрежи напиша дека има нови информации во врска со обидот за атентат. Притоа, без да понуди докази, тој го повтори тврдењето дека станувало збор за „заговор на демократите за да ме исфрлат од изборите“.
Досегашните истраги покажаа дека напаѓачот дејствувал сам и не се пронајдени докази што ги поврзуваат демократите со нападот. Трамп исто така додаде дека поранешниот директор на ФБИ, Кристофер Вреј, „треба да сноси последици“ за реакцијата на агенцијата на обидот за атентат, „а секако и за она што го кажа“. Вреј беше назначен да го води ФБИ од самиот Трамп за време на неговиот прв мандат, иако подоцна Трамп стана негов остар критичар.
Бланш, кој во времето на нападот беше личен адвокат на Трамп, на брифингот објасни дека бил покрај Трамп во текот на целата истрага. Тој рече дека заедно работеле за да утврдат што точно се случило. „Неговата фрустрација и загриженост во врска со постапките на поранешниот директор не се ништо ново“, рече Бланш, осврнувајќи се на ставот на Трамп кон Вреј.