Пет лица загинаа, а 34 се повредени откако автобус удрил во шест возила на автопатот И-95 во американската сојузна држава Вирџинија, соопшти државната полиција.
Несреќата се случила околу 2:35 часот по локално време на јужната лента од автопатот И-95 во округот Стафорд, во момент кога сообраќајот се забавувал поради работи на патот.
Според првичните информации од истрагата, автобусот не успеал навреме да забави и удрил во шест возила кои се движеле пред него.
„Прелиминарната истрага покажува дека сообраќајот се забавувал поради претстојна работна зона. Автобусот не ја намалил брзината и удрил во шест возила“, соопшти полицијата.
Сите пет жртви биле патници во возилата што биле погодени од автобусот, додека тројца од повредените се наоѓаат во критична состојба.
Засега не е познато за каква намена се користел автобусот, ниту колку патници имало во него во моментот на несреќата.
Полицијата соопшти дека истрагата е во тек и дека се очекува поднесување обвиненија.
Јужните ленти на автопатот останаа затворени и седум часа по несреќата, а сообраќајот беше пренасочен.