Преку ова писмо упатено до Собранието, вработените и двајцата преостанати заменици на Народниот правобранител апелираат за итно решение за, како што го нарекуваат, безизлезната ситуација во која се наоѓаат од јули месец. Претходно веќе доставувале известувања до Собранието, но не добиле одговор.
„Вработените во институцијата на Народен правобранител во моментов не се во можност да ги остварат поголемиот дел од правата кои произлегуваат од работниот однос, а од јануари 2026 постои реален ризик да не ги добијат личните примања, со што ќе се доведе во прашање редовното остварување на уплатите за здравствено и социјално осигурување, како и за пензиско осигурување. По овие причини, оправдано го поставуваме прашањето: дали државата има потреба од таква институција?“ – велат од канцеларијата на Народниот правобранител.
На прашањето за ова, претседателот на Собранието, Африм Гаши, го истакна значењето на институцијата на Народен правобранител, особено сега пред повторените избори на 11 јануари, и ги повика пратеничките групи да покажат политичка волја.
-Што се однесува до процедурата, направивме сè за да се обезбеди таа да тече без проблеми, но бевме изненадени од политичката волја на партиите. Сите знаете дека потребно е да се гласа со мнозинство и со голем Badinter. Го користам овој момент преку вас, медиумите, да повикам сите политички партии да го деблокираат овој процес, да најдат решение, и политичките актери да седнат и да постигнат решение, изјави претседателот на Собранието, Африм Гаши.
Институцијата Народен правобранител остана без раководител откако Насер Зибери замина во пензија. Во моментов функционира само со двајцата заменици – Илбер Руфати и Соња Трифуновска. Народниот правобранител се избира и се разрешува од Собранието.