Основното јавно обвинителство Скопје покрена постапка против четири малолетни лица поради сомнение за насилство врз 13-годишно девојче. Станува збор за една 17-годишна и три 14-годишни девојчиња, за кои се сомнева дека учествувале во два одвоени инциденти.
Од Обвинителството информираат дека до судијата за деца при Основниот кривичен суд Скопје е доставено барање за поведување подготвителна постапка, бидејќи постои основано сомнение дека сториле дејствија кои според Кривичниот законик се квалификуваат како кривично дело „Насилство“.
Поради сериозноста на случајот, начинот на извршување и останатите околности, јавниот обвинител предложил и определување мерки на претпазливост за малолетничките.
Во меѓувреме, во врска со истите настани, до Обвинителството биле доставени и шест кривични пријави против родители, по членот што се однесува на запуштање и малтретирање дете. Според наводите, тие ја занемариле својата должност за грижа и воспитување, по што нивните деца извршиле физички напад врз 13-годишното девојче во скопската населба Ѓорче Петров.
Пријавите се распределени кај надлежни обвинители, а во тек е постапка за обезбедување докази и проверка на сите наводи.