Рок музичарот Jack White го најави објавувањето на својот седми соло-албум „Frozen Charlotte“, кој ќе биде достапен од 10 јули. Како најава за новото издание, тој го претстави и новиот сингл „Dollar Bill“, песна со изразени блуз елементи.
Новиот албум доаѓа како наследник на минатогодишното издание No Name и ќе содржи вкупно 13 песни. Меѓу нив се и неодамна објавените синглови „G.O.D. And The Broken Ribs“ и „Derecho Demonico“.
Вајт го најави албумот преку серијалот Release Lab на Third Man Records, кој нуди увид во креативниот процес зад издавањето музички проекти. Внимателните гледачи забележаа и скриена најава за новиот албум во завршницата на едно од видеата од серијалот.
Музичарот дополнително го потврди проектот и преку објава на социјалните мрежи, каде што го претстави визуелниот концепт на албумот. Истата уметничка инсталација се појавува и во видеоспотот за „Dollar Bill“.
„Frozen Charlotte“ ќе биде достапен во повеќе формати, вклучувајќи стандардно црно винил издание, лимитирани колекционерски верзии во различни бои, како и на компакт-диск и касета.
По објавувањето на албумот, Вајт ќе започне турнеја низ Велика Британија, Ирска, Европа и Северна Америка. Меѓу најавените настапи се и два концерта во лондонската сала Eventim Apollo.
Листата на песни на албумот ја сочинуваат: „G.O.D. And The Broken Ribs“, „Derecho Demonico“, „There’s Nobody There“, „Raising The Grain“, „You’ll Never Fix Me“, „Nobody Knows“, „Dollar Bill“, „I Can’t Believe What I’m Hearing“, „Thick As Thieves“, „All Alone Again“, „She’s In A Frenzy“, „Making Contact“ и „Neighbors Blues“.
Во пресрет на новото издание, Вајт неодамна настапи во телевизиското шоу Saturday Night Live, каде ги изведе новите песни, а заедно со актерот и музичар Jack Black ја изведе и култната песна Seven Nation Army.
Минатиот месец, Вајт ја отвори и својата прва јавна уметничка изложба во London, истакнувајќи дека изложбата прикажува креативна страна од него која, како што рече, „повеќето луѓе не ја познаваат“.