Дрес на кошаркарската легенда Мајкл Џордан, кој тој го носел и го потпишал за време на финалето на НБА во 1998 година, е продаден за 14 милиони долари, поставувајќи нов рекорд за колекционерски предмет поврзан со кошарката.
Аукциската куќа „Хант Окшнс“ во понеделникот соопшти дека продажбата била реализирана преку приватен договор.
Станува збор за црвениот дрес на Чикаго Булс, кој Џордан го носел на 5 јуни 1998 година, на вториот натпревар од финалната серија против Јута Џез. Булс победиле на тој натпревар, изедначувајќи ја серијата на 1:1.
Чикаго Булс ја добиле финалната серија со 4:2, освојувајќи ја шестата титула во НБА и последната во кариерата на Џордан.
Дресот го купил Рон Фирман, инвеститор во секторот за недвижности во Мајами. Тој изразил воодушевување од купувањето, истакнувајќи го талентот на Џордан и неговото влијание во целиот свет.
Според Дејвид Хант, претседател на „Хант Окшнс“, продажбата покажува дека предметите поврзани со Мајкл Џордан добиваат сè поголема вредност на колекционерскиот пазар, споредлива со онаа на иконските уметнички дела.
Сепак, дресот на Џордан не го држи апсолутниот рекорд за дрес користен на натпревар. Тој рекорд му припаѓа на дресот на бејзбол-легендата Бејб Рут, кој во 2024 година беше продаден за 24,12 милиони долари.
Интересот за дресовите на Џордан од финалето во 1998 година е исклучително голем. Дресот што го носел на првиот натпревар од финалето беше продаден за околу 10,1 милион долари во 2022 година, додека друг дрес, носен на третиот натпревар, минатиот месец достигна цена од околу 12,3 милиони долари.
Дресот што неодамна беше продаден, Чикаго Булс првично го купиле од приватен колекционер во 2003 година. Според аукциската куќа, до последната продажба тој имал само уште еден сопственик.