Од ДУИ денеска излегоа со реакција по повод спојувањето на Влен во една партија која ќе има двајца претседатели – Биљал Касами и Изет Меџити.
Тие велат дека вчерашниот чин на оваа партија не претставува обединување, туку последен очаен крик за политички опстанок.
„Иронијата е целосна – ВЛЕН избра двајца кормилари да го управуваат истиот брод кој веќе забрзано тоне.
Ова фрагментирано раководство е директно признание дека во тој политички блок владеат недоверба и целосна поделеност. Наместо визија, тие понудија пазар на ега, бидејќи никој не сакаше да му отстапи место на другиот, па одлучија да глумат партија со двајца претседатели.
Вистината е јасна: ВЛЕН се обедини само за заедно да се распадне.
Поставувањето двајца лидери е доказ дека партијата е поделена на фракции уште пред да почне да функционира. Во меѓувреме, министри и клучни функционери од нивните редови веќе го напуштаат бродот, одбивајќи да бидат дел од овој неуспешен проект, наменет само за спас на неколку политички кариери.
Албанците не заслужуваат политички експерименти. Вчерашниот ден треба да остане запаметен само како почеток на крајот на еден политички блок кој ја жртвуваше иднината на сопствениот народ за да ги зачува фотелјите.
Коалицијата ВЛЕН се соочува со вистински кадровски дебакл. Додека одвнатре се распаѓаат, продолжуваат да испраќаат лажни пораки за „нула корупција“, додека реалноста ги демантира на секој чекор.
Не може да се бори против корупцијата партија создадена вештачки, кога самата ја практикува во дело.
Речиси две години се на власт, а билансот на нивните клучни ветувања е нула:
• Уставни измени: Главниот столб на изборите во 2024 година – ветувањето дека нема влада без уставни измени, или дека измените ќе се случат за три, односно шест месеци – официјално е напуштено.
• Децентрализација и инфраструктура: Нема никаква децентрализација на општините, напротив, централизацијата е продлабочена, а нема ниту подобрување на локалната инфраструктура во средините со мнозинско албанско население.
• Албанска академија: Ветената академија на науките и уметностите заврши полошо и од некое локално и невидливо здружение.
• „Албанска банка“: Наместо поддршка за албанските бизниси, ги измамија гласачите и дозволија влез на српски капитал преку Alta Banka.
• Обложувалници и казина: Лажни се покажаа ветувањата за нивно затворање. Законот беше повлечен од Собранието, додека Изет Меџити продолжи да профитира од монополот „Мегавин“, за кој самиот тврдеше дека ќе биде затворен.
• Охридскиот договор и јазикот: Наместо зајакнување на Инспекторатот за јазици и достоинствен третман на албанскиот јазик, напредуваат само деловните интереси на нивните лидери.
• Граѓаните како акционери: Ветуваа дека народот ќе има удел во јавните добра и државниот имот. Во реалноста, „акционери“ во профитабилните бизниси, како казината и банките, станаа само луѓе блиски до раководството.
• И многу други ветувања со кои ги измамија Албанците.
Многу скоро ќе бидат предмет на итен меѓународен ветинг за имотот на функционерите, како и на целосна ревизија на криминално стекнатиот имот на кланот околу Меџити“, велат од ДУИ.