Европската унија отвора можност за нов модел на соработка со Канада, која би можела да стане првата придружна членка на Унијата. Предлогот го упати претседателката на Европската комисија, Урсула фон дер Лајен, во својот годишен говор за состојбата во Унијата во Европскиот парламент во Стразбур.
Обраќајќи му се на канадскиот премиер Марк Карни, фон дер Лајен порача дека ЕУ сака односите со Канада да ги подигне на највисоко можно ниво.
„Затоа сакам да работам со вас на отворање на вратата за Канада да стане првата придружна членка на ЕУ“, рече таа.
Фон дер Лајен ги опиша Канада и Европската унија како партнери кои споделуваат заеднички вредности и интереси. Таа нагласи дека во новите глобални околности се потребни пошироки коалиции и посилни партнерства за заштита на демократските вредности.
Предлогот доаѓа во период на продлабочување на соработката меѓу Канада и ЕУ. Двете страни веќе имаат партнерства во областите на трговијата, технологијата, енергетиката, безбедноста и одбраната, а Канада во февруари годинава стана првата неевропска земја што се приклучи на иницијативата на ЕУ „Безбедносна акција за Европа“ (SAFE).
Канадскиот премиер Марк Карни претходно нагласуваше дека неговата земја сака да ги продлабочи врските со европските партнери. Владата во Отава посочува дека Канада и Европа ги поврзуваат заедничка историја, вредности и сè поголем број заеднички интереси.
Карни, сепак, претходно јасно порача дека Канада не сака да стане полноправна членка на Европската унија. Наместо тоа, тој се залага за продлабочување на партнерството, оценувајќи дека двете страни имаат исти вредности и приоритети, како и комплементарни предности.
Повикот од Брисел доаѓа во момент кога Канада ги засилува односите со европските земји и ја диверзифицира својата мрежа на меѓународни партнерства. Карни неодамна ја опиша Европа како природен партнер на Канада во услови на променетата глобална безбедносна и економска средина.