Франција воведе строги мерки за спречување на ширењето на хантавирусот откако еден од пет патници вратени од крузер кој стана епицентар на епидемијата беше потврден дека е заразен. Новата регулатива предвидува дека патниците, како и сите лица со кои биле во контакт или се изложени на „сериозен ризик од инфекција“, можат да бидат сместени во изолација до 42 дена.
Француската министерка за здравство Стефани Рист потврди дека граѓанката е позитивна на тестот денес, откако беше евакуирана од бродот во неделата. Според „Ле Фигаро“, жената почнала да се чувствува лошо на летот за Франција во неделата вечерта, откако бродот се закотвил во шпанското пристаниште Тенерифе. Останатите патници ќе бидат повторно тестирани, а сите петмина сега се во изолација во Париз, рече Рист.
Инфекцијата беше потврдена и кај американски државјани кои се враќале од истиот брод. Министерството за здравство и човечки услуги на САД во неделата потврди дека еден од 17-те репатрирани Американци е позитивен на тестот, додека друго лице покажува симптоми на болеста.
Претседателката на Европската комисија, Урсула фон дер Лајен, им се заблагодари на Шпанија и на другите власти за брзото истоварување на патниците во неделата, додавајќи дека тесно соработуваат со здравствените агенции за нивна евакуација.
Претставници на Светската здравствена организација (СЗО) минатата недела објавија дека би можеле да бидат потврдени повеќе случаи на инфекција, бидејќи продолжува тестирањето на патниците и нивните контакти. Во исто време, СЗО се обидува да ги смири стравувањата, нагласувајќи дека оваа епидемија не претставува здравствен ризик на ниво на пандемијата ковид-19.