Пештерата Врело во кањонот Матка повторно го привлече вниманието на љубителите на екстремните подводни истражувања, откако полскиот нуркач Бартломиеј Питала, со поддршка на меѓународен тим, достигна длабочина од 338 метри. Подвигот претставува ново значајно достигнување за истражувањето на пештерата и можност за поголема меѓународна афирмација на Скопје.
Истражувањето траело девет часа, а во него учествувале нуркачи од Македонија и Полска, заедно со членовите на спелеонуркачкиот клуб „Врело“. Реализацијата на ваква сложена експедиција барала високо ниво на знаење, подготовка, тимска координација и истрајност.
Градоначалникот на Скопје, Орце Ѓорѓиевски, го поздрави достигнувањето, оценувајќи го како причина за гордост за градот и државата. Тој им честиташе на Питала, на членовите на клубот „Врело“ и на сите учесници во истражувањето, нагласувајќи дека ваквите подвизи заслужуваат континуирана поддршка.
Ѓорѓиевски најави дека Град Скопје и во иднина ќе ја поддржува работата на клубот преку програмата на Секторот за локален економски развој, вклучително и активностите поврзани со подводните истражувања.
Според него, достигнувањето отвора можности за дополнителна промоција на Скопје и привлекување посетители од странство. Тој посочи дека Матка претставува значајно природно богатство кое треба да се заштитува, но и соодветно да се претстави пред светската јавност.
Со ваквите истражувања, пештерата Врело продолжува да го привлекува вниманието на меѓународната нуркачка заедница, а Матка добива дополнителна можност да се афирмира како дестинација за спелеонуркање и авантуристички туризам.