Поранешниот премиер и претседател на ВМРО-ДПМНЕ Никола Груевски, по повод денешното сведочење на премиерот Зоран Заев за случајот „27 април“, истакнува дека Заев уште еднаш ја покажал патолошката омраза кон него давајќи лажна изјава со држење политички говор во судот дека тој бил организатор на настаните од 27 април.
„Тој денес уште еднаш јавно покажа дека е промотор на овој длабок и интензивен политички прогон врз мене каков што одамна не се случил во македонската историја. Токму тој, понекогаш во соработка со други негови соработници, лично го осмислува и го нарачува прогонот против мене, често и кон мои блиски соработници со цел да ги притисне и уцени да бидат сведоци во неговиот нечовечки нагон да ми направи најголеми можни штети, понижувања, апсења, судења, пресуди, затвори и секаков друг вид малтретирања. Има повеќе причини за тоа, а едно од тие сигурно е што јас сум антипод на неговите политики на промена на уставното име, идентитет и историја на македонскиот народ, но и антипод на неговите безидејни економски политики и редица други политики и резултати. Добро е што јавноста знае колку тежи зборот и колку е искрен со јавноста и со сите околу него, бидејќи постојано и безмалку континуирано јавноста, граѓаните се сведок на неговите лаги и лажни ветувања.“, пишува Груевски.
Груевски вели дека од она коешто го дознава во последните месеци, Заев на многу негови блиски, но и не многу блиски им говорел дека во овој мандат ќе направи најголеми можни напори и активности за да го затвори, употребувајќи секакви можни и најбрутални методи.
„И во тоа е постојан и посветен. Од лажни и паушални сведочења како денешното, изнуда на изјави и сведоци, следења, заплашувања, уцени, притворања и други дивјачки методи кон моите блиски и соработници, па до креирање на нови судски случаи, диктирање на пресуди на судиите на сите нивоа а потоа и нивно наградување за послушноста, давање задачи на обвинителите и инструкции на контролираните од него медиуми“, додава Груевски.
Тој посочува дека Зоран Заев знае дека тој не е организатор на насилно влегување во парламентот, и свесен е дека нема никаков доказ за тоа.
„Тој знае дека ниту обвинетите на чие судење беше денес повикан како сведок, на кои исто така по негова нарачка им судат, не нарачале насилство од било каков вид, независно дали е насилен влез во собранието или употреба на физичка сила кон пратеници, ниту организирале тероризам. Тие се обвинети како и многу други, со цел да бидат исплашени, да паднат со духот, да бидат уценети и скршени и да прифатат да бидат негови соработници во гнасното сценарио за неправеден прогон кон мене, кое откако не му помина се обидува да го поправи впечатокот за неговите валкани игри во нивните очи“, порачува Груевски.
Тие се невини, истакнува Груевски и додава дека истите не се ниту организатори, ниту изманипулирани ниту можеле да организираат терористички акт кој не се случил.
„Како што и оние кои се во затвор а кои се осудени со лажна и невистинита квалификација за тероризам. Со судските процеси кон многу мои соработници, Заев очајно бара сојузници, бара луѓе кои или се исто како него измамници или се малодушни и уценети па очекува да прифатат да му бидат слуги во овој политички прогон кон мене. Тој очајно работи на тоа на секаков начин, некаде со добро и со убедување, понуда или ветена награда, некаде со лошо, со закани, заплашувања, притисоци, уцени и апсења. Праќа луѓе, пораки, понуди, ги притиска обвинителите и судиите и едноставно и очигледно мојот прогон му е во врвот на неговите приоритети и непрекинато е силно посветен и мотивиран на тоа“, објаснува поранешниот премиер Груевски.
Тој вели дека Заев, исто така, е свесен дека никому не му било кажано да организира или да влезе во собранието и изврши насилство, ниту пак било помислено такво нешто.
„Тој знае и дека доколку тоа сум го имал направено невозможно е тоа да се скрие. Тој денес не кажа некакви факти или сериозни докази за тоа како и на кој начин тоа сум го направил, туку паушално и со политички говор по којзнае кој пат ме обвини за нешто за што немам никаква вина. Оваа патолошка омрза на овој човек кон мене, како и на дел од неговите соработници, како и посветеноста да ми направи колку што е можно поголемо зло е соодветна за лекарска анализа и медицинско проучување.Сега особено кога е на почетокот на нов мандат, “влезен е во филм” дека ќе е вечно со ваква моќ како сега, дека е семоќен, дека може се што ќе науми да направи и секого што ќе посака да уапси, уништи, извалка или елиминира и дека толку многу ќе ми наштети што никогаш нема да можам да се извлечам од тоа. Таквите нечесни намери нема да му успеат а кога еден ден ќе го свати тоа, ќе се кае, но нема да може да го избрише своето валкано минато и нечовечки однос“, завршува тој.
Груевски вели дека проблемите кои актуелниот премиер ги има заради силната и оправдано негативната реакција на македонскиот народ кон него по однос на неговите политички ставови поврзани со барањата на дел од соседите, го прават, како што вели, „понервозен, по гневен, по раздразнет и по зол и очигледно тоа секогаш го потсеќа на мене и моите политики во истиот дел, па посегнува по нови активности и атаци против мене“.