Македонскиот претприемач Никола Андреевски, кој изгради кариера во американската транспортна и логистичка индустрија, беше меѓу гостите на вечера одржана на имотот Мар-а-Лаго во Флорида, каде што имаше можност лично да се сретне со американскиот претседател Доналд Трамп.
Андреевски, кој потекнува од Велес и повеќе од една деценија живее и работи во Соединетите Американски Држави, присуствувал на настанот во петокот навечер. За време на вечерата, тој се поздравил со Трамп и разменил неколку зборови со американскиот претседател.
Македонскиот бизнисмен е извршен директор на компанијата „МДН Фрејт“, со седиште во Чикаго, која работи во секторот за транспорт и логистика. Неговиот професионален пат започнал со работа во основните сегменти на индустријата, по што постепено напредувал до раководна позиција.
Денес, како извршен директор, Андреевски се фокусира на проширување на капацитетите на компанијата, подобрување на оперативната ефикасност и развој на долгорочни деловни партнерства.
Во јуни годинава, тој беше меѓу добитниците на признанието „Бизнис елит – 40 под 40“, доделено во Њујорк на млади претприемачи и деловни лидери за нивните професионални достигнувања.
Покрај ангажманот во транспортниот сектор, Андреевски е и еден од основачите на Американскиот балкански трговски центар. Иницијативата има за цел да ги поврзе компаниите од САД и Балканот, да поттикне деловна соработка и да отвори можности за нови инвестиции.
Ова не е негово прво присуство на настан во Мар-а-Лаго. Во март годинава, Андреевски учествувал на донаторска средба посветена на Џо Мичел, кандидат за американскиот Конгрес од Ајова. На настанот присуствувале и високи претставници на американскиот политички и деловен живот, меѓу кои Том Емер и Џејсон Смит, претседател на Комитетот за начини и средства во Претставничкиот дом.
На слична донаторска средба во Мар-а-Лаго учествувал и во мај 2025 година, заедно со претставници на балканската бизнис-заедница во САД и поранешниот гувернер на Илиноис, Род Благојевиќ.
Професионалниот пат на Андреевски е пример за македонски иселеник кој развива деловна кариера во САД, а истовремено работи на поврзување на американските и балканските компании преку нови деловни контакти и иницијативи.