Изјавите на американскиот претседател Доналд Трамп, кој се заканува на Газа со „пекол“ доколку заложниците не бидат ослободени до сабота се „безвредни и само ги комплицираат работите“, изјави лидер на Хамас.
„Трамп мора да запомни дека постои договор што двете страни (Израел и Хамас) мора да го почитуваат и дека тоа е единствениот начин затворениците да се вратат“, рече Сами Абу Зухри, лидер на палестинското исламистичко движење.
„Заканувачкиот јазик е безвреден и само ги комплицира работите“, додаде тој.
Кревкиот прекин на огнот посредуван од Катар со помош на САД и Египет стапи на сила на 19 јануари меѓу Израел и Хамас по повеќе од 15 месеци војна што го опустоши Појасот Газа.
Прекинот на огнот досега резултираше со ослободување на 16 израелски заложници, киднапирани на 7 октомври 2023 година, за време на нападот на Хамас што ги предизвика непријателствата, во замена за околу 700 Палестинци држени од Израел. Ослободени се и пет тајландски заложници.