Најмалку едно лице е убиено во напад врз два танкери за нафта во Персискиот Залив, соопштија ирачките власти рано утрово во четврток, додека Саудиска Арабија и Кувајт соопштија дека собориле беспилотни летала на нивна територија.
Нападот, кој се случи во ирачките територијални води, претставува кршење на суверенитетот на земјата, изјави портпарол на ирачката армија, објави државната новинска агенција ИНА. Шест бродови беа испратени да им помогнат на екипажите на двата нападнати танкери, рече тој.
Танкерите беа погодени во близина на пристаништето Ум Каср во јужен Ирак. Портпаролот додаде дека меѓу вкупно 38 членови на екипажот од двата танкера, едно лице загинало.
Првичната истрага на ирачките безбедносни претставници покажа дека бродови натоварени со експлозиви од Иран ги погодиле двата танкери, објавија Ројтерс и Си-Ен-Ен.
Станува збор за бродот „Сејфси Вишну“, кој плови под знамето на Маршалските Острови, и бродот „Зефирос“, кој плови под знамето на Малта, изјавија двајца ирачки пристаништни службеници.
Неколку други бродови во водите на Персискиот Залив беа нападнати со ракети, објавија поморските власти.
Цените на нафтата повторно скокнаа над 100 долари за барел преку ноќ, веројатно поради новите ирански напади врз танкери и затворањето на Ормутскиот теснец.